ثلاث قصايد متشابهه

السلام عليكم ورحمة الله وبركاته

لقيت هالقصايد الثلاث بديوان (القصايد الضائعة بالمواقف الرائعة)للشاعر:فلاح بن شايش المنيس المفضلي الشمري

وهو ذاكر ان القصايد للـ (مسعود عبد أبن هذال و للبصري الوضيحي وللصايل الزعيلي)

حبيت انهن يكونن بالمنتدى للفايدة لان الواضح انهن متشابهات للحد كبير وكمى ذكر المؤلف قد يحصل الخطاء في تداخل بعض الابيات

قال مسعود عبد أبن هذال بعد أنحدار عنزة من الحناكية وهو بقى للحاله:

[poem=font="Simplified Arabic,5,white,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
امس الضحى نطيت أنا راس مزموم=تلعبي الارياح شرقٍ وشامي
رجمٍ طويلٍ ماشبط راسه البوم=كود العقاب الصيرمي والقطامي
أبكي هلي ياناس ماني بمليوم=أضن من يبكي هله ما يلامي
ماهو على غروٍ من الوشم ماشوم=على الشيوخ معدلين الجهامي
يا صاح صّياحٍ من الضد مزحوم=يردون حوض الموت ورد الضوامي
هذي مرابط خيلهم دايم الدوم=حقب العيون مروبعات الهوامي
علمي بهم كتوا مع الوادي أبو دوم=مستجنبين مطيرات العسامي
وخلاف ذا ياراكبٍ فوق منسوم=يقطع قواريص الرسن والخطامي
يلفي لعمي زاهي الكبر والزوم=زيزوم قومٍ كالجراد التهامي
على ركايا الرس والداث معلوم=أولاد وايل صايرينٍ ركامي
أقفوا كماطيرٍ قلب راسه الحوم=بهيفيةٍ ما يندرى وين حامي
بس الوجار اللي به الثلم مثلوم=مركا الدلال المتعبات الشوامي
من طاوع الثنتين يصبر على اللوم=يصبر على فرقا الاهل والعمامي[/poem]



وهذي قصيدة بصري الوضيحي اللي تتداخل مع قصيدة مسعود

قال بصري:

[poem=font="Simplified Arabic,5,white,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
يا عيال يا متروحينٍ على كوم=عجلات بالممشى حفافٍ همامي
بالله عليكم ريضوا ياما أنا أقوم=خوذوا كلام محزنٍ ما ينامي
ودوا سلامي للجماعات ملزوم=داروا عليهن لين ياصل سلامي
خوذوا أمّني ودوا من القيل مفهوم=من جم موجٍ ريهجانٍ أجمامي
مسيركم مقدار خمسة عشر يوم=تلفون رباعٍ مسعداتٍ كرامي
وليا لفيتوا ديرتي أصحاب من قوم=أحكوا تروا حمض الرجال العلامي
علم الفرح يشتاقله كل مهموم=بنٍ بكاس الهند بافم الصيامي
قولوا تراني براس عيطا وصعموم=عيطا سنادٍ زابنه ما يضامي
مع نقرس المدلاه مفني شفا القوم=بالليل تسريله بليل الظلامي
ياجوا مسايير على الراي وعلوم=طبعٍ لبو زيران صفق البرامي
جيت المراح وذكرنا كل شغموم=منازل الخلان هم والعمامي
علمي بهم بقصيرٍ وقبله التوم=تعاطوا المعبار والشط زامي
أتلا الخبر مروا شثاثا ولملوم=تنحروا مربا الوحش والنعامي[/poem]

وهذا مرد صايل الزعيلي الشمري على بصري قال:



[poem=font="Simplified Arabic,5,white,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
عسى ركيبٍ روح العصر للقوم=يوخذ ولا يجري عليه السلامي
ياراكبٍ من عندنا فوق عمعوم=عليه من وصف الوضيحي تهامي
حرٍ زعاعٍ بالزعانيف والزوم=مثل الظليم لينطلق بانسهامي
بطاك عن بيت الوضاحا ربع يوم=هل الهبيط مسيحين اليدامي
يابصري الوضحان تدغث من النوم=وحنا ثمان أيام سهرٍ تمامي
وراك تمحش دمعتك تقل مضيوم=تر البكاء من غير مصيبٍ حرامي
عسى الغنم للذيب والذيب له دوم=عساه يقطع شركها كل عامي
أنشدك عن الكرات هن شقفٍ أوتوم=يامضاحك الكراء ليال الفطامي
مارحت معنا قاعدٍ لك على توم=وحنا نلاوي صرعهن واللجامي
قبٍ يلاوي روسهن كل شغموم=حرد اليدين مطيرات العسامي
واد المراء مرنّه الصبح بجهوم=ترعى به القطعان والرمي حامي
ترعى به الشقحاء الطيوح أم خرطوم=طويلة النسنوس عجفا سنامي
ترعا من الارقب ليا حزم كيهوم=ترعى به الشقحاء قرار الوسامي
بي ظل شمر روحن نشوة غيوم=يروون عطشان السيوف المظامي
بي ظل شيخٍ يزبنه كل مزحوم=مخالبه من كثر ألادلأ دوامي[/poem]

بعض الاسماء غريبة في القصايد خصوصا أسماء الاماكن

وابي اوضح بعضهن حسب معرفتي:
شثاثا هي قرية جنوبٍ من الجزيرة بالعراق
لملوم هو حزم ماهو بعيد من شمال عن شثاثا
الارقب وحزم كيهوم هن حزوم في غرب العراق بالمنطقة القريبة من عنزة في ذيك الايام

وبالنهاية ما يسلم الامر من أخطاء ولا كامل الا وجه العزيز الكريم

تقبلوا تحياتي

مشكور يالغالي على موضوعك الرائع وتوضيح القصايد على حده00



وامثالهن واجد يصير بهن تداخل مثل:


ابوزويد : دخيل خذ من والدك لك مساله000 مسالتن مايفهمه كل رجال


عبدالله بن رشيد: الحمد للباري فزع من شكى له00 والحمد له ثاني على كل الاحوال



القاضي: لعل براقن حقوقن خياله000 محن(ن) مرن وللرعد فيه زلزال



ابن ربيعه: يابادي بالقيل هذا بداله00 قولن بدل قولن ومالن عوض مال



القاضي ايضا : الصمت به سر سعد من يناله000 والهذر به شر وشومن وغربال



وهكذا كثير ولعلي افرد موضوعا مع الاختصار لاشهر المتشابهات000

لاهنت يالغالي


على هالقصايد والتوضيح


لاهنت

حياك الله يابو فهد بمرورك اللي اسعدني

ومثل ما تفضلت المتشابه كثير لانهم شعار ومنهلهم واحد وضروفهم وحدة فبعض التشابه قد يكون توارد افكار وبعضة خطاء بالنقل والرواية

وفكرة الموضوع انك تورد المتشابه من القصايد فكرة طيبه

أشكر لك مرورك وتعليقك

ولا خلا ولا عدم منك ومن الاخوان جميع

حياك اخوي ريال الفسحه

ومن قال مايهون

أشكر مرورك

ولا خلا ولا عدم منك ومن الاخوان جميع

سلمت يمينك



ويعطيك العافيه





تقبل تحيتي

حياك صدى الشمال

اشكر مرورك

ولا خلا ولا عدم منك ومن الاخوان جميع

تسلم على ها الموضوع

يعطيك العافيه


الله لايهينك

كفيت ووفيت

حياكم اخوي السفاعي واخوي مانع السرحاني

اشكر مروركم الكريم

ولا خلا ولا عدم منكم ومن الاخوان جميع