مواقف الرجال

.
.
المدح في من يستحقه يجي زين
يصوغ في ذكره وينقاد صوبه


في كل شهم فالقسا فعله يبين
مواقفه عند الرجال محسوبه


مانافس اللي يكنزون الملايين
يسوق ماله دون حاله جلوبه


ياطالب سلم الوفا خلك يمين
المرجلة ما هي بمنك محجوبه


راع الوفا يرجح بكل الموازين
والناس يلقونه على ما هقوبه


راع الوفا مواقفه تعجب العين
واللاش منها خاليات جيوبه


لاحتجت والّا احترت من بين الأمرين
ترى السنع لك بيّنات دروبه


اذخر لحاجاتك فروخ الشياهين
فعل الطيور تشوف فيه العجوبه


أي الحرار الشقر واي الكراوين
منهن وش اللي فالهداد اقتصوبه


والطيب كايد والرجاجيل شرهين
والناس ما خلوا حدٍ ما حكوبه


من طاب قالوا فيه والله ونعمين
ومن هان قالوا عند ذكره وكوبه


والعز كنز ما يقدر بتثمين
للغانمين اللي شقوا وتعبوبه


والوقت يمضي والخلايق مغيرين
ولا به احدٍ فيه يصفي شروبه


من عاش قرن قال أنا عشت يومين
يفطن بها العاقل وياخذ جروبه


ان الحياة أحلام والعمر تقنين
والآدامي مثل القمر وصّفوبه


وأتعس حياة,, جارنا الله من الشين
من طال به عمرٍ وكثرت ذنوبه


يا الله عسانا سالمين معافين
في رحمتك نطمع ونخشى العقوبة


يا اللي عبادك لك صيام مصلين
واسمك بمبدا دينهم وحّدوبه


المومنين الخاشعين الملبين
من زود جودك يرتجون المثوبه
.
.
-
#شعر

محمد بن محسن بن حشفل الدوسري
.

.